Muse | Paribhasha | 21st Mar. '10

main - aur meri paribhasha:
lagta hai ki main ek nibandh hoon;
apne likhe hue lekh -
kuch shabd jo vyakt karte hain
apne astitva ko;
cheshtha karte hain: bolne va batane ki

-----apni ek kahani

jo shooroo hua likhna toh
na jaane shabd kahan se
anayaas hee aa jaate hain;
mano gomukh se jaise na jaane kaise
ek boond jal - ik ganga bana deta hai.
is silsile mein na jaane aaye kitne
gadya aur padya, prishtha va pustak

-----anokhi - par ek dooje se gunthi hui

par kabhi kabhi lagta hai ki main
to sirf baadhya hoon,
ik nibandh ke shabdon ki tarah
jo apni bhasha ke dwara
paaribhashit karte hain;
aur us paribhasha mein hi

---mujhe lapeete hain - baandh kar, seemit karte hain

aise kshanon mein jab maayoos main
un lekhon ko padhta hoon,
unke arth jaannee ka prayaas
toh na jaane kyun shabdkosh vyarth lagte hain;
mere shabdon ka arth keval
meri hi likhit shabdkosh mein hain;

-----unme nihit poornta meri abhivyakti hi toh hai

mera hi lekh, meri hi shabdkosh
mere hi arth, mujh mein nihit saamarth;
jaanne ki koshish karta hoon main
kai baar bhatak kar doojon se raasta pooch,
main pathik chalta hoon; ek bindu vishraam baad,
naye shabd jaal likhte hue...

--- ek nayi paribhasha mein apne ko khojte hue...